إشجاب هاي على ذيـج؟

نكتة ولكن!
إشجاب هاي على ذيـج!؟

السيد وزير السياحة في حكومة المالكي الجديدة الدكتور لواء سميسم ( طبيب اسنان ) في مدينة النجف.المعروف عن السيد لواء انه انسان بسيط ومؤدب لا يجيد غير مهنته وهي طب الاسنان من قلعٍ الى حشوٍ وما الى ذلك من شؤون المهنة , ساقه الحظ الى ان يكون زوجا لبنت خالة السيد مقتدى الصدر,

في ذلك المساء من ايام النجف الحارة و قبل اعلان تشكيل الحكومة العراقية الجديدة بساعات اتصل به السيد مقتدى الصدر ودار بينهم الحوار التالي:

ـ مقتدى مخاطبا لواء : حبيبي نريدك اتصير وزير السياحة, وباجر يعلنونها, وما عدنه غيرك.

ـ لواء: شنوووو؟ تحجي صدك؟

ـ مقتدى: قابل انا اتشاقا وياك حبيبي

ـ لواء: سيدنا اني طبيب اسنان, كجً مرحبه ويا السياحه ؟

ـ مقتدى: حبيبي كتلك ماعدنه غيرك

ـ لواء: عمري ما اهتميت بالسياحه , المرة الوحيدة بحياتي الي سافرت بيها هي للاردن انا وعائلتي, من ردنه ننهزم من صدام وبعدين قشمرونه ونصبوا علينا المهربين واخذوا من عدنه 12 الف دولار وبعدين رجعنا للنجف , تتذكرها سيدنا, اني وين والسياحه وين؟

ـ مقتدى: كتلك ما عدنه غيرك نثق بيه, وبعدين حبيبي وين اكو سياحه حتى انت خايف , همه بس الايرانيين وذوله شغلتهم بسيطة حبيبي جثرلهم من الهريسة واللطم وابوك الله يرحمَ.

ـ لواء: سيدنا اني ما اموقع امر اداري بحياتي متكلي شلون راح ادبرها

ـ مقتدى : حبيبي جا احنه من خلينا سلام المالكي وزير نقل جان يفتهم شي , تعرف حبيبي سلام صار وزير نقل وهو ما يعرف الطياره من الغراب الاسود, وبعدين صارت شركاته ماليه العراق وابو ظبي والاردن وما تكدر تشتري مولدة كهرباء الا من شركات سلام , حبيبي, يعني صار مليونير ان صح التعبير , وكله بسنه وحده حبيبي.

ـ لواء : سيدنا اني شغلتي راح تصير قلع اسنان السواح بلاش.

ـ مقتدى : موفق حبيبي وحنه وجيش المهدي وراك

ـ السيد الوزير لواء سميسم: هو اكو واحد بجيش المهدي يقرا ويكتب سيدنا , لا هواية راح تطور السياحة.

أنتهى الحوار بين حجة الاسلام والمسلمين مقتدى (حفظه الله ورعاه) وبين المسكين الدكتور لواء سميسم واصبح السيد الوزير.

وسيعود من تسولُ له نفسه بالسياحة الى العراق( أثرماً ) بعد قلع اسنانه من قبل السيد الوزير.

للعودة الى الصفحة السابقة